x

疫情下想減壓必食人氣甜品 日台人氣甜品令你身心超舒暢

持續抗疫咗一段日子,相信大家都囤積咗唔少壓力,所以話得閒食吓甜品,令自己身心愉快,對減輕壓力都好有幫助㗎!今次就同大家深入屯門同埋天水圍,介紹兩間日台人氣甜品店,招牌甜品包括有外脆內軟嘅台灣殿堂級牛角包,同埋嫩滑嘅原隻椰子燉蛋白,食完令人壓力全消,心情超舒暢。

 

隱世和風小屋 嫩滑椰子燉蛋白

1

 

2

 

呢間位於天水圍嘅隱世甜品小店,雖然同天水圍港鐵站 E3 出口只係一街之隔,但地點卻較爲隱蔽,要沿住小路經過一棟棟古舊建築先可到達。四周環境寧靜舒適,嚟呢度暫避都市煩囂,品嚐一下治癒心靈嘅甜品,就最適合不過喇。店面設計獨特,外牆畫有一條和風大魚,大走日系路線。店內只有五、六張檯,而天氣好時就可坐出外面露天座位,享受一個和暖嘅下午。所有甜品即叫即整,當中有麻糬內餡嘅日式窩夫、同埋原隻椰子燉蛋,最受食客歡迎 。

 

3

雜果椰皇燉蛋白

椰皇燉蛋白絕對係女士至愛、健康養顏之選。蛋白燉製時間控制得啱啱好,相當嫩滑,蛋白吸取咗椰皇精華,帶有陣陣椰香。原隻椰皇上檯,視覺上大滿足,健康好味又唔怕肥。

 

4

紫薯窩夫配雪米滋

日式窩夫係呢度嘅招牌之一,好多人食過都讚不絕口。平時窩夫內餡加有麻糬,份外煙韌,呢款仲加埋紫薯,配埋窩夫上層嘅紫薯蓉、紫薯脆片同紫薯糯米糍,多重口感,一試滿足。

 

一糖

地址:天水圍屏山上璋圍 249 號地下 1 號舖

 

 

台灣過江龍  殿堂級牛角包

5

 

6

 

嚟自台灣嘅人氣過江龍,有「殿堂級牛角包」之稱嘅八月堂,近年旋風式登陸香港,喺太古、將軍澳開分店後,亦隨即喺屯門、葵青、荃灣、馬鞍山同大埔開設分店。全部牛角包即場新鮮焗製,唔同分店仲有獨有嘅期間限定口味,例如大埔店限定嘅榛果巧克力同埋荃灣海之戀店限定嘅珍珠奶茶口味伯爵金鑽,各有特色,難怪間間分店都有咁多人大排長龍啦!

 

3

焦糖杏仁卡士達

對於鍾意甜食嘅朋友,呢款焦糖杏仁卡士達口味就啱曬你喇。一口咬開鬆脆嘅牛角包,見到好似蜂巢咁層次分明,入面填滿香濃順滑嘅卡士達醬,外層配以手工烘烤製成嘅杏仁片,外脆內軟,咬落啖啖滋味!

 

4

黃金流沙

不得不介紹嘅係呢一款鹹蛋黃口味嘅黃金流沙!之前見到台灣堂友一致好評,今次嚟到現場咁啱遇着出爐時間,梗係要趁新鮮熱辣食翻件啦!相比起店內其餘甜味嘅牛角包,黃金流沙係較少數嘅鹹口味, 味道又出奇地夾!外皮酥脆鬆軟,蜂巢牛角包散發出陣陣奶油香,一口咬落去,流出嘅係特選鹹蛋黃流餡, 加上黑芝麻襯托點綴果份濃郁鹹香口感,食完幸福感指數爆燈!

 

八月堂 Hakukido Hakukido

地址:屯門屯順街1號屯門市廣場1期1樓Kiosk 15