x

夏日少女心!大熱日本甜品店 直送Deluxe密瓜雪糕 甜到入心

夏日炎炎,食翻一杯透心涼嘅雪糕除咗有消暑作用,仲可以治癒內心,爲平凡嘅一日打造靚靚心情!人氣大熱嘅雪糕甜品店 I Cremeria, 以日本直送新鮮時令炮製各款水果雪糕甜品,當中以「日本直送 Deluxe蜜瓜芭菲」最爲奢華,其最上盛的日本綠茶甜品深受抹茶控高度評價, 一試難忘!今次港Style美食巡禮就同你嚟到東薈城名店倉嘅I Cremeria,試下店舖大熱嘅雪糕啦。

 

1

 

2

 

早前來港開店時曾出現大批人龍,好多人都要喺店外門口立食,最新開嚟東涌名店城,店面裝修華麗,各處擺設亦相當精緻,令人仿如置身喺日本奢華甜品屋入面。

 

3

 

4

日本直送 Deluxe 蜜瓜芭菲

鎮店之作當然要數呢款 Deluxe 密瓜芭菲。由日本知名水果產地出產嘅高知縣 Deluxe 青肉蜜瓜,曾被坊間形容爲「被上天和大海寵幸之蜜瓜」,由無農藥溫室栽培,由控溫、滴灌、施肥都係電腦全自動控制。新鮮日本搭飛機過嚟,店家仿照北海道地區做法,原隻密瓜切半奉上。密瓜入口超鮮甜,皮薄、肉質軟腍多汁而又咬感實在,完全係入口即化嘅食感。加埋啖啖奶香嘅北海道牛乳雪糕一齊食,蜜瓜同奶配合得天衣無縫,簡直係奢華味覺享受。

 

5

柚子抹茶餡蜜芭菲

芭菲嘅底層係有機玄米、柚子醬、啫喱,中層係抹茶布丁同埋混合味雪糕,而上層就有柚子大福、白玉同埋一層柚子醬,多重滋味,一次盡享。

 

6

源自日本京都宇治抹茶雪糕

來店必試之一嘅日本綠茶雪糕!呢度選用嚟自京都宇治老字號森半嘅矜貴抹茶粉。綠茶雪糕入口微苦後有回甘,帶嚟最正宗嘅日本口味,備受綠茶控推崇。

 

7

北海道牛奶雪糕 mix 源自日本京都宇治抹茶雪糕

店內最受食客歡迎嘅雪糕之一,日本北海道牛奶雪糕同日本京都宇治抹茶相混合,北海道香甜牛奶遇上綠茶甘甜參半,味道岩岩好。雪糕杯底層係有機玄米,咬落仲卜卜脆,相當有口感。

 

8

 

9

士多啤梨蛋糕套餐配蜜桃紅茶

少女心洋溢嘅士多啤梨蛋糕,其趣致方塊可愛造型,最適合 IG 打卡!士多啤梨蛋糕入口超軟棉,忌廉極之香滑 。套餐配蜜桃紅茶一壺,溫暖甜蜜,打造全日好心情。

食完雪糕,可以喺東薈城名店倉行下,早前新一期修建完成,有更多國際名牌專門店進駐,價錢更至一折起 ,即刻去尋寶先。

 

i CREMERiA


地址:東涌達東路20號東薈城名店倉2樓263號舖