x

港STYLE 美食巡禮 - 印度篇 異國風情七彩素食餐廳

近年,越嚟越多香港人崇尚健康飲食,唔少人更因此加入素食行列。講到素食,印度可以算係將素食變得出神入化、五花百門,亦係最多素食者嘅國家之一。今次港STYLE 多國美食巡禮嚟到印度站,同大家一齊嚟試食印度特色素菜。

 

1

 

2

 

呢間位於尖沙咀嘅樓上印度餐廳,室內裝修顏色鮮豔,餐廳中間掛滿印度特色七彩飯盒,另一面牆就寫滿藝術字,別有格調。座位同座位之間都有綠色植物相隔,配上對比色彩強烈嘅座位,充滿異國風情。

 

3

印度特色薄荷水配炸圓脆餅 Pan Puri

以賣相可愛嘅油炸泡芙小食作爲頭炮,入面裝有香辣薯泥同埋發咗芽嘅扁豆,配搭自家祕製嘅薄荷水,同埋印度特色羅望子醬,將醬汁倒入圓形脆餅再一啖過食,味道微帶酸辣,一口咬落去,其「脆」無窮。

 

4

印度旁遮普式咖喱角 Punjabi Samosa

用色彩繽紛小貨車盛載嘅兩粒 Punjabi 咖喱角,脹卜卜用料十足,內層係香辣薯仔配鷹嘴豆醬,以伴有洋蔥碎同芫荽點綴,顏色十分吸引。咬落口,十分鬆脆。

 

5

 

5

印度黏土烤特式奶酪串燒 Paneer Tikka

用印度黏土烤箱裏烤製而成嘅雙色醃製奶酪芝士,紅綠兩色對比鮮明,賣相已經相當吸睛,紅色芝士粒係加咗紅辣椒醃製,而綠色芝士粒就係加咗青辣椒醃製而成。芝士味道濃郁,帶有一陣鹹香,加上香料及青草味,口感豐富。

 

7

 

8

奶酪番茄馬薩拉 + 大蒜烤餅 Garlic Naan

嚟到印度餐廳又少得 Masala 同 Naan 呢。今次試芝士番茄馬薩拉同大蒜烤餅,喺印度粘土烤箱烤製嘅大大粒芝士,加上香濃番茄、印度香料 Chatpata 同其他多種香料醬料,口感濃郁,中等辣度,點 Naan 食簡直係絕配。Naan 有分大蒜同牛油味兩種,大蒜味相對比較脆。

 

9

粉紅秘魯 Namkeen Pink Peru

用番石榴汁製成的特色無酒精雞尾酒,色彩粉嫩,番石榴甜中帶點tabasco味道,而杯邊亦沾有一圈嘅辣椒香料,一飲微辣,十分刺激。

 

10

鮮青檸水 Nimbu Paani

印度Style嘅青檸水,可以根據自己喜好選擇較甜、較鹹或者係混合口味,只要落單時同店員講聲就可以。青檸夠曬清新, 最啱用嚟配襯味道濃郁嘅印度菜。

 

11

另外,提提大家,餐檯上面嘅樽裝水係需要收費嘅,如果想飲免費水,就要記得要向店員提出要Tap Water呀。

 

Kailash Parbat


地址:尖沙咀寶勒巷3號萬事昌廣場3樓302室